Сэтгүүлч Н.Өнөрцэцэгийн ар гэрийнхэн нь түүнийг цагдан хорилгүйгээр, гадуур шалгаж өгөхийг хүсэж өнөөдөр хэвлэлийн хурал хийлээ.
Н.Өнөрцэцэгийг 2023 оны арванхоёрдугаар сарын 4-нөөс эхлэн 461 дүгээр хорих ангид хоригдсон бөгөөд өнөөдөр суллах сүүлийн өдөр нь байсан боловч хууль зөрчиж дахин нэг сарын хугацаагаар цагдан хорих гэж байгаад эргэлзэж байна гэдгийг ар гэрийнхэн нь онцлов.
Сэтгүүлч Н.Өнөрцэцэгийн дүү “Миний эгч улсдаа нэмэр оруулсныхаа үр ашигт торны цаана сууж байгаад гомдолтой байна. Хууль, шүүхийнхэнд буруу өгөхгүй. Өөгүй хүн байхгүй. Алдаатай зүйл байгаа байх. Найман ишигний хэрэг, бусдын нэр төрд халдсан зэрэгт миний эгч хуулийн хариуцлагаа хүлээнэ.
Нэг иргэн, гэр бүлийг хохироосон байвал манай гэр бүлийнхэн бүгд очоод өмнө чинь өвдөг сөгдөн уучлалт гуйя. Эгчийг минь суллаад өгөөч ээ. Суллаа гээд ялаас мултарч байгаа гэсэн үг биш шүү” гэлээ.
Мөн түүний эгч “Миний дүү витамин зарж олсон мөнгөөрөө л байр түрээсэлж амьдардаг байсан” гэсэн юм.
Түүнчлэн гэр бүлийнхэн нь “Манай гэр бүлийг сайн шалга, бидэнд хэдэн мал, банкны зээл л байна. Өчнөөн тэрбумтай байсан бол зээлтэй байх уу, Хөгжлийн Банк, ЖДҮ, Боловсролын зээлийн сангаас хулгай хийсэн хулгайчуудаа шалгаач ээ. Түүнийг нь илрүүлсэн хүнийг хориод байна” хэмээж байв.